રાષ્ટ્રીય એકતા દિવસ: અમરેલી ખાતે રાજ્યમંત્રી શ્રી કૌશિકભાઈ વેકરીયાની પ્રેરક ઉપસ્થિતિમાં ત્રિ-મંદિર ખાતે ભવ્ય ઉજવણી સંપન્ન

રાષ્ટ્રીય એકતા દિવસ: અમરેલી ખાતે રાજ્યમંત્રી શ્રી કૌશિકભાઈ વેકરીયાની પ્રેરક ઉપસ્થિતિમાં ત્રિ-મંદિર ખાતે ભવ્ય ઉજવણી સંપન્ન
૦૦૦૦૦૦
ભારતના બિસ્માર્ક શ્રી સરદાર પટેલની ૧૫૧મી જન્મજયંતી નિમિત્તે કેવડિયાથી ‘એકતા પરેડ’નું જીવંત પ્રસારણ નિહાળતા અમરેલીના નાગરિકો
૦૦૦૦૦
નાગરિકોએ રાષ્ટ્રની એકતા, અખંડિતતા અને સુરક્ષાને અક્ષુણ્ણ રાખવા સામુહિક શપથ ગ્રહણ કર્યા
૦૦૦૦૦
સાંસદ શ્રી ભરતભાઈ સુતરીયા, અમરેલી નગરપાલિકા પ્રમુખ શ્રી વૈશાલીબેન માંગરોળીયા અને જિલ્લા પ્રભારી સચિવ શ્રી સંદીપકુમારની ઉપસ્થિતિ
૦૦૦૦૦

અમરેલી, ૩૧ ઓક્ટોબર ૨૦૨૬ - ભારતના લોહપુરુષ શ્રી સરદાર વલ્લભભાઈ પટેલની ૧૫૧મી જન્મજયંતી એટલે કે 'રાષ્ટ્રીય એકતા દિવસ' નિમિત્તે સમગ્ર દેશ સાથે અમરેલી જિલ્લો પણ એકતાના રંગે રંગાયો હતો. અમરેલી સ્થિત દાદા ભગવાન ત્રિ-મંદિરના જાયજેન્ટિક હોલ ખાતે રાજ્યના કાયદો અને ન્યાય તેમજ ઊર્જા રાજ્યમંત્રી શ્રી કૌશિકભાઈ વેકરીયાની ગરિમામય ઉપસ્થિતિમાં "રાષ્ટ્રીય એકતા દિવસ"ની ઉજવણીનો ભવ્ય કાર્યક્રમ યોજાયો હતો. 

અમરેલી નગરપાલિકા તેમજ જિલ્લા વહીવટી તંત્રના સંયુક્ત ઉપક્રમે આયોજિત આ કાર્યક્રમમાં દેશભક્તિનો અદભુત માહોલ જોવા મળ્યો હતો, સૌ નાગરિકો અને અધિકારીઓએ રાષ્ટ્રની એકતા, અખંડિતતા અને સુરક્ષાને અક્ષુણ્ણ રાખવા માટેના સામુહિક શપથ ગ્રહણ કર્યા હતા.

ઉલ્લેખનીય છે કે, વડાપ્રધાન શ્રી નરેન્દ્રભાઈ મોદીની પ્રેરણાત્મક ઉપસ્થિતિમાં નર્મદાના એકતાનગર (કેવડિયા) ખાતે સ્ટેચ્યુ ઑફ યુનિટીના સાંનિધ્યમાં રાષ્ટ્રીય કક્ષાની ભવ્ય ઉજવણી કરવામાં આવી રહી છે. એકતાનગર ખાતે આયોજિત આ ઐતિહાસિક અને પ્રભાવશાળી 'એકતા પરેડ'નું દાદા ભગવાન ત્રિ-મંદિર ખાતે વિશાળ સ્ક્રીન માધ્યમથી જીવંત પ્રસારણ કરવામાં આવ્યું હતું. ઉપસ્થિત સૌ મહાનુભાવો, અધિકારીઓ અને બહોળી સંખ્યામાં ઉપસ્થિત નાગરિકોએ આ શૌર્યસભર એકતા પરેડને ઉત્સાહભેર નિહાળી દેશની સૈન્ય શક્તિ અને વિવિધતામાં એકતાના અદભુત દર્શન કર્યા હતા.

આ રાષ્ટ્રીય પરેડમાં દેશના વિવિધ સુરક્ષા દળો, કેન્દ્રીય પોલીસ દળો અને વિશિષ્ટ ટુકડીઓએ જોડાઈને પોતાના અદમ્ય સાહસ, સમર્પણ અને કડક શિસ્તનો ભવ્ય પરચો લહેરાવ્યો હતો. પરેડમાં CRPF, BSF, CISF, ITBP અને SSB જેવા અર્ધસૈનિક દળો ઉપરાંત આસામ રાઇફલ્સ, દેશની સર્વોચ્ચ સુરક્ષા પાંખ NSG તેમજ આપત્તિ વ્યવસ્થાપન ક્ષેત્રે હંમેશા અગ્રેસર રહેતા NDRFના જાબાંઝ જવાનોએ શૌર્યપૂર્ણ પ્રદર્શન કર્યું હતું. આ સાથે જ 'વિવિધતામાં એકતા'ના ભારતીય સંસ્કૃતિના મૂળ સૂરને સાર્થક કરતા આ રાષ્ટ્રીય પર્વમાં દેશના ખૂણે-ખૂણેથી આવેલી વિવિધ રાજ્યોની પોલીસ ટુકડીઓ પણ પોતાના પરંપરાગત શૌર્ય સાથે આ એકતા પરેડમાં ઉત્સાહભેર જોડાઈ હતી.

રાષ્ટ્રીય એકતા દિવસની આ ગરિમામય ઉજવણી નિમિત્તે વડાપ્રધાન શ્રી નરેન્દ્રભાઈ મોદીએ વિશ્વની સૌથી ઊંચી પ્રતિમા 'સ્ટેચ્યુ ઑફ યુનિટી'ના ચરણોમાંથી વર્ચ્યુઅલ માધ્યમ દ્વારા દેશજોગ એક પ્રેરણાદાયી સંબોધન કર્યું હતું. વડાપ્રધાનશ્રીએ પોતાના વક્તવ્યમાં સરદાર વલ્લભભાઈ પટેલના અખંડ ભારતના સ્વપ્નને યાદ કરી દેશની આંતરિક સુરક્ષા, એકતા અને પ્રગતિના પથ પર સાથે મળીને આગળ વધવા આહવાન કર્યું હતું. અમરેલી ખાતે ઉપસ્થિત જનમેદનીએ વડાપ્રધાનશ્રીના આ રાષ્ટ્રવાદી સંબોધનને એકચિત્તે સાંભળીને દેશ પ્રત્યેની પોતાની ફરજો નિભાવવાનો દ્રઢ સંકલ્પ દોહરાવ્યો હતો.

અમરેલી ખાતે આયોજિત આ ગરિમામય અને ભવ્ય કાર્યક્રમમાં અમરેલીના અગ્રણી શ્રી અતુલભાઈ કાનાણી, શ્રી શરદભાઈ લાખાણી સહિતના હોદ્દેદારશ્રીઓ અને સ્થાનિક પદાધિકારીશ્રીઓ, જિલ્લા કલેક્ટર શ્રી વિકલ્પ ભારદ્વાજ, જિલ્લા વિકાસ અધિકારી (ઇન્ચાર્જ) શ્રી કે.જે. જાડેજા સહિતના ઉચ્ચ અધિકારીઓ, કર્મચારીઓ તેમજ અમરેલી પંથકના બહોળી સંખ્યામાં દેશપ્રેમી નાગરિકો ઉપસ્થિત રહ્યા હતા. 

ધર્મેશ વાળા ૦૦૦૦૦